شروط الاستخدام

الخدمة

موعدي نظام على الإنترنت لإدارة العيادات ومختبرات التحاليل: المواعيد، ملفات المرضى، التحاليل، الفواتير، التقارير، وتذكير واتساب. ممكن نطوّر المزايا ونغيّرها مع الوقت.

الحساب

• إنت مسؤول عن صحة بيانات التسجيل، وعن سرية كلمة المرور.
• مالك العيادة مسؤول عن الموظفين اللي يضيفهم وصلاحياتهم.

التجربة والشراء

• كل عيادة جديدة تاخذ تجربة مجانية 14 يوم بكل المزايا، بدون دفع.
• الباقة تنشترى مرة وحدة حسب حجم الكادر، وتبقى فعّالة بدون اشتراك شهري أو سنوي. وإذا كبر الكادر، ترقّي وتدفع الفرق بس.
• الدفع بزين كاش أو كي كارد أو تحويل للمصرف الأهلي العراقي أو نقداً. الباقة تتفعّل بعد ما نتأكد من الدفعة.
• إذا ما تفعّلت الباقة لأي سبب من جهتنا، نرجعلك المبلغ كامل. وإذا ما ناسبك النظام، تقدر تطلب استرجاع المبلغ خلال 7 أيام من التفعيل.

العروض والإحالة

• سعر العيادات المؤسِّسة لعدد محدود من العيادات ولحد تاريخ محدد، وينحسب وقت إرسال طلب الدفع.
• كود الإحالة أو كود صانع المحتوى ينضاف قبل أول شراء، وينطي خصم على أول شراء بس.
• رصيد الإحالة ينكتب بعد ما نتأكد من دفعة العيادة الجديدة، وما ينحسب لعيادتين لنفس صاحب الحساب. ونقدر نلغي أي رصيد جاي من تحايل.
• شروط مسابقة «ودّع الدفتر» موجودة بصفحة المسابقة.

مسؤولية العيادة

• العيادة مسؤولة عن صحة المعلومات الطبية اللي تدخلها، وعن القرارات الطبية. موعدي أداة تنظيم، وما يقدم تشخيص أو نصيحة طبية.
• العيادة مسؤولة إنها تاخذ موافقة مرضاها على حفظ بياناتهم ومراسلتهم على واتساب، وإنها تلتزم بقوانين المهنة بالعراق.
• ممنوع استخدام النظام لإرسال رسائل مزعجة أو لأي شي مخالف للقانون.

توفر الخدمة وحدود المسؤولية

نشتغل حتى يبقى النظام شغّال طول الوقت وناخذ نسخ احتياطية، بس ما نقدر نضمن إنه ما يتوقف أبداً، مثلاً بسبب انقطاع الإنترنت أو مشكلة عند مزود خدمة. مسؤوليتنا بأي حال ما تتجاوز المبلغ اللي دفعته العيادة إلنا.

إيقاف الحساب

نقدر نوقف حساب يخالف هذي الشروط، بعد ما نبلّغ صاحبه إلا إذا كان الضرر عاجل. وتقدر إنت توقف استخدامك بأي وقت، وتصدّر بياناتك قبلها.

القانون والتغييرات

تخضع هذي الشروط لقوانين جمهورية العراق. إذا غيّرناها تغيير مهم، نبلّغ العيادات داخل النظام قبل ما يصير نافذ. لأي سؤال، راسلنا من «الدعم الفني» داخل النظام أو على انستغرام ‎@mawidee.